Simamieni Miradi Ya Maendeleo - Rc Kindamba

Imetumwa: February 7th, 2023

Mkuu wa Mkoa wa Songwe, Mhe. Waziri Kindamba amewaagiza Wakurugenzi wa Halmashauri za mkoa wa Songwe wasimamie ujenzi wa miradi ya maendeleo ili iweze kukamilika kwa wakati kuepusha gharama zisizo na ulazima.

Wito huo wa Mkuu wa Mkoa umetolewa Leo Jumanne Februari 7, 2023 wakati wa kikao cha tathmini za utendaji wa Halmashauri za mkoa wa Songwe ambacho kimefanyika katika Ukumbi uliopo ofisini kwa Mkuu wa mkoa Nselewa.

RC Kindamba amesema fedha zinapotolewa na Serikali kuu au kupitia mapato ya ndani zikiwa na lengo la kujenga mradi fulani zinapochelewa kukamilisha mradi hupelekea kuongezeka kwa gharama za ukamilishaji.

"Miradi mingi inatugharimu fedha nyingi kwa sababu haikamiliki kwa wakati, nendeni mkasimamie miradi ikamilike kwa wakati, tuokoe hela za wananchi", alisema Mhe. Kindamba.

Pamoja na maagizo hayo, Wakurugenzi wametakiwa kuendelea kusimamia mapato na makusanyo ya Halmashauri kwa kuhakikisha watendaji wa kata na vijiji wanaingiza fedha kwenye mifumo salama ya kifedha na kuepusha tamaa na kupotea kwa namna yoyote ile.